Morgunblaðið | 18.1.2019 | 20:34

Skoða þurfi skýrsluna í ljósi gagnrýni

Katrín Jakobsdóttir, forsætisráðherra. mbl.is/Hari

Skoða þarf betur ályktanir í skýrslu Hagfræðistofnunar um þjóðhagsleg áhrif hvalveiða, sérstaklega í ljósi þeirrar gagnrýni sem fram hefur komið á skýrsluna. Þetta sagði Katrín Jakobsdóttir forsætisráðherra í kvöldfréttum RÚV.

Katrín tók einnig undir með umhverfisráðherra sem sagði í samtali við RÚV fyrr í dag að hann furði sig á því að náttúruverndarsamtökum sé líkt við hryðjuverkasamtök.

Í skýrslunni, sem kynnt var í gær, segir að fullyrðingar um neikvæð áhrif hvalveiða á íslenskt efnahagslíf eiga ekki við rök að styðjast. Skýrslan var unnin fyrir atvinnuvegaráðuneytið og mun sjávarútvegsráðherra meðal annars byggja ákvörðun sína um hvort hvalveiðum verði haldið áfram á skýrslunni.

Frétt af mbl.is

Leggst yfir hvalaskýrslu HÍ

Katrín sagði í kvöldfréttum að þær ályktanir sem skoða þurfi sérstaklega tengist meðal annars þeirri gagnrýni sem þegar er komin fram á skýrsluna, það er ályktanir sem eru dregnar um líffræðilegar og vistfræðilegar staðreyndir.

Þá furðar hún sig, líkt og umhverfisráðherra, að náttúruverndarsamtökum sé líkt við hryðjuverkasamtök í skýrslunni. Í skýrslunni (á blaðsíðu 42) segir meðal annars að ef til vill sé tilefni til að setja lög hér á landi til að „vinna gegn uppgangi hryðjuverkasamtaka.“

„Mér finnst það mjög sérkennilegt útspil frá Hagfræðistofnun Háskóla Íslands í garð þeirra náttúruverndarsamtaka sem hafa verið að berjast fyrir sínum málstað í hvalveiðum og bara ekki til að hjálpa umræðunni,“ sagði Katrín.