Morgunblaðið | 1.2.2019 | 18:38

Virði auðlindarinnar stóraukist

Þorsteinn Víglundsson, þingmaður Viðreisnar. mbl.is/Kristinn Magnússon

Þorsteinn Víglundsson, þingmaður Viðreisnar, segir ljóst að mikill ávinningur hafi hlotist af kvótakerfinu og að afkoma útgerðarinnar hafi batnað verulega. Þetta kemur fram á Facebook-síðu þingmannsins. Greinin beri höfuð og herðar yfir aðrar atvinnugreinar hvað varðar arðsemi, fjárhagslegan styrkleika og aðgengi að hagkvæmu erlendu lánsfjármagni. Þetta hafi orðið til stóraukinnar fjárfestingar sjávarútvegarins í óskyldum atvinnurekstri.

„Það gleymist hins vegar í þessu samhengi að um leið hefur virði hinnar sameiginlegu auðlindar þjóðarinnar stóraukist. Núverandi ríkisstjórn virðist ekki telja svo heldur taldi nauðsynlegt að lækka veiðigjöld á sama tíma og þessi þróun er að eiga sér stað. Það er auðvitað hjákátlegt að halda því fram að útgerðin geti ekki greitt eðlilegt verð fyrir aðgang að sameiginlegri auðlind landsmanna á sama tíma og hún er að kaupa upp atvinnulífið.“

Því til viðbótar segir Þorsteinn tvískinnung í málflutningi útgerðarinnar sem beiti sér gegn inngöngu í Evrópusambandið og upptöku evru. Á sama tíma sé greinin í forréttindastöðu gagnvart öðrum fyrirtækjum þegar komi að aðgengi að erlendu lánsfjármagni og vaxtakostnaði.