Morgunblaðið | 20.2.2019 | 17:00

Frönsk fegurð undir áhrifum New York

Hægt er að blanda saman áferðum af varalitunum fyrir meira áberandi förðun.

„Það er draumi líkast að við fáum að hanna snyrtivörulínu í samstarfi við svo þekkt lúxusmerki í snyrtiheiminum,” segja Jack McCollough og Lazaro Hernandez en þeir eru stofnendur og aðalhönnuðir bandaríska tískuhússins Proenza Schouler. Nýverið kom á markað snyrtivörulínan Fall Chroma sem þeir unnu í samstarfi við franska snyrtihúsið Lancôme og er útkoman ferskt, litrík og frjálsleg. Pakkningarnar grípa augað samstundis og er skarpur bleikur litatónninn áberandi.

Förðunarlínan Fall Chroma er samstarf Lancôme og Proenza Schouler.

Bleiki liturinn er áberandi á pakkningum snyrtivaranna.

Hönnun Proenza Schouler endurspeglar sterkan og frjálsan kvenleika sem kemur skýrt fram í förðunarlínunni þar sem konur eru hvattar til að nota litina eins og þeim finnst þeir koma best út. ,,Proenza Schouler ýtir undir styrkleika kvenna og það er það sama og við hjá Lancôme höfum alltaf haft að leiðarljósi,” segir Francoise Lehmann, stjórnandi hjá Lancôme.

Chroma Eye Palette

Augnskuggapallettur með 10 litum, bæði mattir og sanseraðir. Það skemmtilega við pallettuna er að helmingur augnskugganna er með kremaðri áferð á meðan hinn helmingurinn er með púðuráferð. Með mismunandi áferðum geturðu leikið þér með litadýpt og förðunin endist lengur. Augnskuggapalletturnar koma í tveimur litasamsetningum en Warm Chroma inniheldur hlýja litatóna á meðan Cold Chroma býr yfir heldur kaldari tónum.

Chroma Eye Palette er augnskuggapalletta með 10 augnskuggum sem búa bæði yfir kremuðum og púðurkenndum formúlum.

Chroma Eye Palette í litnum Warm Chroma.

Chroma Eye Palette í litnum Cold Chroma.

Ombre Hypnôse Kajal Chroma

Ein af mínum uppáhaldsvörum innan línunnar er Ombre Hypnôse Kajal Chroma en þessa kremuðu og langvarandi formúlu má nota sem augnblýant, augnskugga, kol eða jafnvel til að búa til freknur á húðina. Kemur í fjórum litum: svörtum, brúnum, grábrúnum og blágrænum.

Ombre Hypnôse Kajal Chroma er kremuð og langvarandi formúla á augun á meðan Lip Kajal er varalitur með tvenns konar áferð.

Lip Kajal x Proenza

Skemmtilegur varalitur sem býr yfir kajal á öðrum endanum og glossi á hinum. Kajal-inn má nota til að móta varirnar eða sem mattan varalit og svo má setja glossið yfir eða nota eitt og sér. Með því að blanda áferðunum færðu sterka og grafíska útkomu. Kemur í fjórum litatónum.

Lancôme Juicy Shaker er fljótandi varalitur sem er léttur á vörunum og svo er hægt að toppa förðunina með naglalakki í stíl.

L’Absolu Rouge x Proenza

Innan línunnar eru fjórir varalitir með tveimur mismunandi áferðum. Litirnir Minimal Red og Graphic Orange koma í flauelskenndum áferðum á meðan Pure Nude og Abstract Burgundy búa yfir léttari þekju.