Morgunblaðið | 23.2.2019 | 20:21 | Uppfært 25.2.2019 20:06

Níð fyrir náð drottins?

Franskur dómstóll hefur heimilað sýningar á nýrri kvikmynd leikstjórans François Ozon en í myndinni er sögð saga sem byggir á sannsögulegum heimildum um prest sem er sakaður um að hafa beitt ungan skátadreng kynferðisofbeldi. Málið hefur aldrei komið til kasta dómstóla.

Myndin, Grâce à Dieu, hlaut Silfurbjörninn á kvikmyndahátíðinni í Berlín nýverið. Presturinn sem fjallað er um í myndinni, Bernard Preynat, reyndi að stöðva sýningar á myndinni í Frakklandi þar sem hann taldi að hún gæti skaðað málstað hans.

Franski leikstjórinn François Ozon á blaðamannafundi eftir að mynd hans Grâce à Dieu fékk Silfurbjörninn í Berlín. AFP

Myndin var frumsýnd í Frakklandi á miðvikudag, daginn áður en Frans páfi setti ráðstefnu Páfagarðs þar sem umfjöllunarefnið er kynferðislegt ofbeldi innan kaþólsku kirkjunnar.

Frétt af mbl.is

Níðingsverk í skjóli kirkjunnar

Ozon hefur unnið að Grâce à Dieu, sem hægt er að þýða sem Fyrir náð drottning, í mörg ár og hefur leynd hvílt yfir verkefninu. Þar er sögð saga sem kom upp á yfirborðið árið 2015 þegar François Devaux greindi opinberlega frá því að Preynat hafi beitt hann kynferðislegu ofbeldi 25 árum áður en þá var Devaux í skátunum.

Preynat var vísað úr starfi af hálfu kaþólsku kirkjunnar það sama ár og í ljós kom að kardínáli hans, Philippe Barbarin, hafði borið á hann sakir um barnaníð árið 2010 vegna orðróms sem var uppi en presturinn hélt því fram að hann væri breyttur maður.

Frétt af mbl.is

Erkibiskupinn laus allra mála

Fjórum árum síðar greindi Barbarin, sem er nú erkibiskup í Lyon, frá málinu í Páfagarði en lét hjá líða að tilkynna það til lögreglu.

Réttarhöldum yfir kardínálanum og fimm öðrum er nýlokið vegna þeirra hlutar í málinu og verður dómur kveðinn upp 7. mars. Ekki hefur verið gefið upp hvenær réttarhöld hefjast í máli Preynat.