Morgunblaðið | 2.5.2019 | 11:52

Nýju skipin fjögur komin til Noregs

Flutningaskipið með skipin í Brattavogi. Ljósmynd/Gjögur

Fjögur togskip sem norska skipasmíðastöðin Vard er að smíða fyrir útgerðirnar Gjögur og Skinney-Þinganes komu til hafnar í Brattavogi í Noregi í gærmorgun, um borð í flutningaskipinu Jumbo Jubilee.

Skipin fjögur, Vörður ÞH-44, Áskell ÞH-48, Steinunn SF-10 og Þinganes SF-25, komu með flutningaskipinu alla leið frá Víetnam, þar sem þau voru sjósett í febrúar, en lagt var af stað til Noregs 31. mars.

Frá vinstri: Steinunn, Áskell, Þinganes og Vörður. Ljósmynd/Gjögur

Lokið verður við smíði skipanna í Noregi, en þau eru hluti af sjö skipa raðsmíðaverkefni sem íslensk útgerðarfyrirtæki sömdu um við Vard, sem rekur m.a. skipasmíðastöðvar í Noregi, Rúmeníu og Brasilíu, auk Víetnams.

Auk Gjögurs og Skinneyjar-Þinganess er verið að smíða tvö skip fyrir Berg-Hugin, dótturfélag Síldarvinnslunnar, og eitt fyrir Útgerðarfélag Akureyringa. Síðarnefndu skipin þrjú verða að öllu leyti smíðuð í Noregi, en afhenda á öll skipin á þessu ári.