Reyndu að brjótast inn í þinghúsið
Setja bókamerki
Mótmælendur í Hong Kong reyndu í dag að brjótast inn í þinghús sjálfstjórnarsvæðisins, en 22 ár eru liðin frá því að Bretar afhentu Kínverjum yfirráð yfir borginni.
Lögregla hefur beitt táragasi og kylfum í tilraun til þess að halda aftur af mótmælendum sem reyndu að trufla fánahyllingarathöfn.
Íbúar Hong Kong halda árlega viðburði og krefjast lýðræðis á deginum sem markar yfirráð Kína yfir landinu, en stjórnvöld hafa biðlað til skipuleggenda viðburðanna að aflýsa þeim af öryggisástæðum.
Mótmælaalda hefur geisað í Hong Kong síðan frumvarp sem myndi leyfa framsal afbrotamanna til Kína var lagt fram á þinginu. Afgreiðslu frumvarpsins hefur verið frestað um óákveðinn tíma, en mótmælendur láta engan bilbug á sér finna og krefjast þess nú afsagnar héraðsstjórans Carrie Lam.
