Beittu kylfum gegn mótmælendum
Setja bókamerki
Til átaka kom milli lögreglu og mótmælenda á enn einum mótmælunum í sjálfstjórnarhéraðinu Hong Kong í dag. Lögregla beitti piparúða og kylfum gegn mótmælendum sem lokuðu götum í borginni Sha Tin. Grímuklæddir mótmælendur svöruðu með því að loka svæðum með járngirðingu.
Mótmælt hefur verið með reglulegu millibili í rúman mánuð núna eftir að stjórnvöld tilkynntu áætlanir um að leggja fram frumvarp sem heimilaði framsal sakamanna til Kína. Carrie Lam, ríkisstjóri Hong Kong, hefur dregið í land með frumvarpið og sagt það „dautt“ en mótmælendur efast um heilindi hennar.
Kjósa Bandaríkin og Breta framyfir Kína
Þess einnig krafist að hún biðjist afsökunar á að hafa kallað mótmælendur óeirðarseggi og að hún segi af sér sem ríkisstjóri. Þá krefjast mótmælendur þess að rannsókn fari fram á aðgerðum lögreglumanna gegn mótmælendum en þær þykja hafa verið langt yfir velsæmismörk.
Tugir þúsunda mótmælenda fylltu götur borgarinnar Sha Tin í dag, margir þeirra með breska og bandaríska fána.
„Við höfum mótmælt ítrekað en stjórnvöld neita enn að taka mark á kröfum okkar sem þýðir að við þurfum að halda áfram,“ sagði Tony Wong mótmælandi við fréttastofu AFP.
Margir mótmælendur eru á því að stjórnvöld í Kína séu sífellt að seilast lengra og lengra til áhrifa í sjálfstjórnarhéraðinu og eru orðnir þreyttir á því. Kínversk stjórnvöld styðja þétt við bakið á Carrie Lam og hefur kallað eftir því að lögregla hafi hendur í hári mótmælenda sem láta friðsamleg mótmæli ekki nægja.
