Morgunblaðið | 2.8.2019 | 19:30

Þjóðhátíð sett í Herjólfsdal

Páley Borgþórsdóttir lögreglustjóri og Elliði Vignisson bæjarstjóri í Ölfusi spjalla við tjaldgesti. mbl.is/Óskar Pétur Friðriksson

Þjóðhátíð var sett í Herjólfsdal í Vestmannaeyjum áðan. Viðstatt var fólk af öllum sviðum þjóðlífsins, eins og sjá má á myndum. Kór Landakirkju tók lagið og Þórlindur Kjartansson flutti hátíðarræðu.

Þórlindur Kjartansson flutti hátíðarræðu á setningunni. mbl.is/Óskar Pétur Friðriksson

Bjargsigið var á sínum stað. Það var Bjartur Týr Ólafsson sem lék listir sínar og menn fylgdust andaktugir með. Jói Pé og Króli tóku lagið fyrir krakkana á litla pallinum og Latibær kíkti í heimsókn.

Kvöldvakan hefst í kvöld klukkan níu og þar verður þjóðhátíðarlagið frumflutt af Bjartmari Guðlaugssyni. Að auki stígur fjöldi listamanna á svið.

Verið er að flytja þúsundir manna til Vestmannaeyja með Herjólfi í dag og fleiri eru væntanlegir næstu daga. Þegar er mikið stuð og stemning í hvítu tjöldunum.