Morgunblaðið | 4.8.2019 | 20:30

Hátíðarhöldum lýkur með Sparitónleikum

Fjölmenni fylgdist með dagskránni á Ráðhústorginu í gær. mbl.is/Þorgeir

„Það er mjög margt fólk í bænum,“ segir vakthafandi lögreglumaður hjá lögreglunni á Akureyri í samtali við mbl.is. Fjölskylduhátíðin Ein með öllu hefur farið fram í bænum nú um verslunarmannahelgina líkt og undanfarin ár og var stemningin góð líkt og meðfylgjandi myndir bera með sér.

Talsverður erill var hjá lögreglu í nótt og fengu þrír að gista í fangaklefa vegna tveggja aðskildra líkamsárásarmála. Að sögn lögreglu hafa hátíðarhöldin að öðru leyti gengið vel fyrir sig og eru tjaldsvæðin á Akureyri og í nágrenni nokkuð full.

Fjölmenni gerði sér ferð í Lystigarðinn til að gæða sér á litríkum möffins. mbl.is/Þorgeir

Met var þá slegið í Lystigarðinum í gær þegar á þriðjaþúsund möffins seldust á tveimur tímum á möffinsbasarnum Mömmur og möffins.

Frétt af mbl.is

„Fer vaxandi með hverju árinu“

„Það safnaðist rúm milljón á þessum tveimur tímum,“ segir Valdís Anna Jónsdóttir sem er í forsvari fyrir Mömmur og möffins í samtali viðmbl.is í gær. Ágóðinn af möffinssölunni fer í að styrkja fæðingardeild sjúkrahússins á Akureyri.

Tjaldstæðið á Hömrunum, líkt og önnur tjaldstæði á Akureyri og í næsta nágrenni voru nokkuð full. mbl.is/Þorgeir

Einni með öllu lýkur svo með sparitónleikum í kvöld á samkomutúninu við Drottningarbraut, en meðal þeirra sem þar koma fram eru Gréta Salóme, Jónas Sig, Friðrik Dór og Herra Hnetusmjör.