Morgunblaðið | 23.8.2019 | 15:55

Nálgast tvö þúsund tonn af makríl

Brynja SH er aflahæsti báturinn það sem af er makrílvertíðinni. mbl.is/Alfons Finnsson

Alls hafa færabátar veitt um 1.886 tonn af makríl það sem af er liðið vertíðinni á þessu sumri. Á sama tíma á síðasta ári hafði 2.021 tonni verið landað, en það er þrátt fyrir að veiðarn í ár hafi hafist töluvert fyrr í ár en í fyrra.

Þessu veldur einna helst léleg veiði undanfarna viku, sem gefið hefur aðeins um hundrað tonn. Til samanburðar veiddust um þúsund tonn á tímabilinu 17. ágúst - 23. ágúst í fyrra.

Brynja SH aflahæsti báturinn

Á þetta er bent á vef Landssambands smábátaeigenda, en þar segir að fjörutíu bátar hafi verið að makrílveiðum þessa vertíð.

Aflahæsti báturinn er Brynja SH með 127 tonn en fimm aðrir bátar eru komnir með yfir hundrað tonn: Fjóla GK með 126 tonn, Addi afi GK með 123 tonn, Júlli Páls SH með 122 tonn, Siggi Bessa SF með 114 tonn og Guðrún Petrína GK með 106 tonn.