Á annan tug ferða aflýst frá Hong Kong
Setja bókamerki
Starfsemi alþjóðaflugvallarins í Hong Kong raskaðist enn eina ferðina í dag þegar á annan tug ferða var aflýst eftir að þúsundir mótmælenda lokuðu vegum að flugvellinum, sem er einn sá fjölfarnasti í heiminum.
Öllum ferðum flugvallarhraðlestar hefur verið aflýst þar sem svartklæddir mótmælendur hafa sett upp vegatálma og hindranir við götur sem liggja að flugstöðvarbyggingum. Lögreglan hefur herjað á mótmælendur í neðanjarðarlestum og segist vera að bregðast við „róttækum mótmælendum“. Lögreglumennirnir eru vopnaðir kylfum, táragasi og gúmmíkúlum. Óljóst er hvort farþegar lestanna hafi verið þátttakendur í mótmælunum eða ekki.
Merkja mótmælendur með lituðu vatni
Þetta er þrettánda helgin í röð sem mótmælendur safnast saman á götum Hong Kong til að mótmæla og aukinn þungi hefur verið í mótmælunum sem og viðbrögðum lögreglu. 900 manns hafa verið handteknir frá því að mótmælin hófust í júní.
Lögreglan hefur sprautað lituðu vatni á mótmælendur sem hunsuðu bann sem sett var á mótmæli helgarinnar, sem áttu að marka það að fimm ár eru liðin frá því að íbúar mótmæltu afskiptum kínverskra yfirvalda af kosningum í sjálfsstjórnarhéraðinu.
Kveikjan að mótmælunum var lagafrumvarp sem heimila átti framsal brotamanna til meginlands Kína. Mótmælin hafa síðan þróast upp í kröfu um aukið lýðræði.
Mótmælin um helgina eru sögð skorta leiðtoga. Á föstudag voru þekktir aðgerðasinnar handteknir, Joshua Wong og Agnes Chow, og segja mannréttindahópar að þetta sé í samræmi við aðgerðir kínverskra stjórnvalda – að fjarlægja þá sem gætu reynst óþægur ljár í þúfu.
Mótmælendur fela sig nú fyrir öryggismyndavélum undir þúsundum regnhlífa til að forðast handtöku. Lögreglan hefur gripið til þess ráðs að sprauta lituðu vatni á mótmælendur til að aðskilja þá frá þeim sem ekki taka þátt í mótmælunum.
