Aðildarríkjaþing samnings Sameinuðu þjóðanna um varnir gegn eyðimerkurmyndun (UNDCCD) var sett í Nýju-Delí í gær. Guðmundur Ingi Guðbrandsson, umhverfis- og auðlindaráðherra, verður viðstaddur ráðherrahluta þingsins í næstu viku.
Loftlagsmál verða fyrirferðarmikil á þinginu og þær lausnir sem felast í bættri landnýtingu. Þetta kemur fram í tilkynningu á vefsvæði Stjórnarráðs Íslands.
Eyðimerkursamningurinn, eins og hann er oft nefndur hér á landi, er einn af þremur samningum Sameinuðu þjóðanna um umhverfismál. Hinir eru rammasamningar um aðgerðir til að draga úr loftlagsbreytingum og samningur um verndun líffræðilegrar fjölbreytni.
Ísland er aðili að öllum þremur samningum.
Á þinginu verður lögð áhersla á mikilvægi þess að þróaðar verði leiðir til að takast á við landhnignun. Aukið þanþol vistkerfa er afar mikilvægt til að draga úr áhrifum náttúruhamfara eins og flóða og skriðufalla, segir í tilkynningunni.
„Þá hefur land og nýting þess veruleg áhrif á aðra umhverfisþætti, s.s. loftslagið. Þannig veldur hnignun jarðvegs vegna ósjálfbærrar nýtingar því að gróðurhúsalofttegundir losna í miklum mæli út í andrúmsloftið á meðan sjálfbær landnýting og endurheimt vistkerfa leiðir til uppsöfnunar kolefnis í jarðvegi.“
Búist er við að yfir 3.000 fulltrúar víðs vegar úr heiminum sæki aðildarríkjaþingið sem er 14. þing samningsins (COP14). Von er á ráðherrum frá 196 þjóðríkjum.
Guðmundur Ingi Guðbrandsson, umhverfis- og auðlindaráðherra, mun m.a. stýra hringborðsumræðum um tengsl lands, loftslags og orku og ásamt fulltrúa Namibíu stýra fundi svokallaðs vinahóps (e. Group of friends) 23 ríkja sem eiga í samstarfi um aðgerðir vegna þurrka, landhnignunar og eyðimerkurmyndunar.
Þinginu lýkur 14. september. Fylgjast má með framvindu þess á vef samningsins og jafnframt má fylgjast með vefútsendingu frá fundum.