Morgunblaðið | 26.9.2019 | 5:30 | Uppfært 5:59

Enginn með aflahlutdeild yfir kvótaþakinu

Brim og Samherji njóta hæstrar aflahlutdeildar.

Enginn aðili fer einn og sér yfir hámarkshandhöfn á aflahlutdeildum á fiskveiðiárinu 2019/2020. Í aflamarki má enginn einn aðili fara með meira en 12% af samanlögðu heildarverðmæti aflahlutdeilda allra tegunda.

Heildarhlutdeild í krókaaflamarki má ekki fara yfir 5% af samanlögðu heildarverðmæti krókaaflahlutdeilda. Auk þessa er hámark í einstökum tegundum.

Fiskistofa birti á heimasíðu sinni í gær upplýsingar um aflahlutdeild stærstu útgerða 1. september og hafa litlar breytingar orðið frá því að sams konar upplýsingar voru birtar í mars í kjölfar úthlutunar aflamarks í deilistofnum um áramót.

Eins og undanfarin ár eru Brim hf. (áður HB Grandi) og Samherji Ísland hf. í tveimur efstu sætunum. Brim hf. er með um 10,44% af hlutdeildunum en var í mars með 9,76%. Samherji er með 7,10%. Samanlagt ráða þessi tvö stærstu útgerðarfyrirtæki landsins því yfir 17,54% af hlutdeildunum í kvótakerfinu. Í næstu sætum koma síðan Fisk-Seafood ehf. á Sauðárkróki, Síldarvinnslan hf. í Neskaupstað og Vinnslustöðin hf. í Vestmannaeyjum.

Stærstu útgerðir í krókaaflamarki eru Grunnur ehf. í Hafnarfirði með 4,51% krókaaflahlutdeildanna. Í öðru sæti er Stakkavík ehf. í Grindavík með 4,08% og Jakob Valgeir ehf. í Bolungarvík með 4,07% í þriðja sæti.

Útgerðum með aflahlutdeildir fækkaði úr 946 á fiskveiðiárinu 2005/2006 í 442 á síðasta fiskveiðiári. Á þessu fiskveiðiári hefur þeim hins vegar fjölgað í 711. Fjölgunin skýrist að langmestu leyti af kvótasetningu á hlýra og makríl.