Morgunblaðið | 1.10.2019 | 6:00

Greiddu 57 þúsund fyrir tvo pastarétti á Ítalíu

Ferðamenn í Róm hafa oft fengið svimandi háa reikninga. mbl.is/Ómar Óskarsson

Tveir japanskir ferðamenn greiddu sem nemur rúmum 57 þúsund íslenskum krónum á veitingastað í Róm á Ítalíu fyrir tvo pastarétti og fisk. Þeim brá í brún þegar þau fengu reikninginn, enda töldu þau sig ekki hafa pantað svo dýran mat.

Hjónin pöntuðu tvo pastarétti, fisk og tvö vatnsglös. Þau greiddu reikninginn en kvörtuðu yfir honum á Trip Advisor. Umsögnin fékk fljótlega mikla athygli og lokaði Trip Advisor fyrir umsagnir hjá veitingastaðnum í kjölfarið þar sem neikvæðar umsagnir hlóðust inn.

Fleiri sögðu sömu sögu af veitingastaðnum en ástæðan af hverju ferðamennirnir fengu svimandi háan reikning er sú að verðið á matseðlinum var ruglandi. Upp var gefið hversu mikið 100 grömm af fisknum kostuðu. Það hefði ekki verið tekið nógu skýrt fram og því margir lent í því að panta sér fiskinn í góðri trú um að verðið sem upp væri gefið væri fyrir allan skammtinn.

Eigandi veitingastaðarins hefur tjáð sig í ítölskum fjölmiðlum og sagt að það hafi verið tekið skýrt fram að verðið væri fyrir hver 100 grömm af fiski. Sambærileg mál hafa komið upp í Róm á síðustu mánuðum þar sem ferðamönnum er gert að greiða á veitingastöðum háa reikninga sem þeir skilja ekkert í.

Lögreglan í Róm hefur hafið rannsókn á málinu og skoðar nú sambærileg mál þar sem verð á matseðlum er óskýrt og ferðamenn hafa greitt um of fyrir mat.