Morgunblaðið | 15.10.2019 | 14:45

Makrílviðræður hófust í dag

Fundurinn í London er reglulegur fundur strandríkja sem haldinn er á hverju hausti til að ræða um stjórn veiða fyrir næsta ár. AFP

Árlegar viðræður strandríkja vegna veiða á makríl, norsk-íslenskri síld og kolmunna hófust í London höfuðborg Bretlands í dag. Viðræðurnar munu standa í um tvær vikur og var byrjað á því að ræða makríl á grundvelli ráðlegginga ICES um veiðar á stofninum fyrir árið 2020.

Í svari sjávarútvegsráðuneytisins við fyrirspurn 200 mílna segir að „á fundinum mun Ísland sækjast eftir því að strandríkin komi sér saman um stjórn veiðanna, enda þarf heildstæða stjórnun til að tryggja sjálfbærni þeirra“.