Þingmenn hrópuðu og kölluðu að Lam
Setja bókamerki
Carrie Lam, leiðtogi heimastjórnar Hong Kong, neyddist til að hætta að flytja stefnuræðu heimastjórnarinnar á þinginu vegna óláta þingmanna.
Stjórnarandstöðuþingmenn hrópuðu og kyrjuðu pólitísk slagorð að Lam um leið og hún hóf að flytja ræðuna. Upptaka af ræðunni var á endanum sýnd í sjónvarpi.
Mótmæli hafa staðið yfir reglulega í Hong Kong síðan snemma í júní og hefur ofbeldi færst í aukana undanfarið. Upphaf þeirra má rekja til lagafrumvarps, sem kynnt var í apríl, sem heimila átti framsal meintra brotamanna til meginlands Kína. Þau þróuðust síðan í ákall um auknar lýðræðisumbætur og að kínversk stjórnvöld létu sjálfsstjórnarborgina afskiptalausa.
Þetta er í fyrsta sinn sem þing heimastjórnarinnar kemur saman frá því í júlí og til stóð að draga frumvarpið til baka á þinginu í gær en ekkert varð úr því sökum óláta þingmanna.
Donald Trump Bandaríkjaforseti hvatti í síðustu viku til þess að mannúðleg niðurstaða fengist í málin í Hong Kong. Í gærkvöldi samþykkti fulltrúadeild Bandaríkjaþings frumvarp sem snýr að því að vernda borgaraleg réttindi íbúa í Hong Kong en mótmælendur í borginni hafa hvatt Bandaríkjaþing til að veita sér aðstoð.
Kínversk stjórnvöld lýstu vanþóknun og andstöðu við frumvarpið og báðu Bandaríkin að hætta að skipta sér af þeirra málefnum.
