Saka Pence um „hroka og hræsni“
Setja bókamerki
Stjórnvöld í Kína hafa saka „Íslandsvininn“ og varaforseta Bandaríkjanna Mike Pence um „hroka og hræsni“ eftir að Pence lýsti yfir stuðningi við mótmælendur í Hong Kong.
Auk þess sakaði Pence NBA-deildina um undirgefni gagnvart stjórnvöldum í Kína.
Hua Chunying, talsmaður kínverska utanríkisráðherrans, sagði á blaðamannafundi í morgun að bandarísk stjórnvöld ættu frekar að sleppa því að varpa einhverju fram án ábyrgðar.
Kínversk stjórnvöld lýstu reiði sinni yfir Twitter-færslu Daryl Morey, framkvæmdastjóra NBA-liðsins Houston Rockets, í byrjun október.
„Berjist fyrir frelsi, standið með Hong Kong,“ skrifaði Morey í færslunni umdeildu sem var fjarlægð fljótlega eftir birtingu.
Mótmæli hafa staðið yfir reglulega í Hong Kong síðan snemma í júní og hefur ofbeldi færst í aukana undanfarið. Upphaf þeirra má rekja til lagafrumvarps, sem kynnt var í apríl, sem heimila átti framsal meintra brotamanna til meginlands Kína. Þau þróuðust síðan í ákall um auknar lýðræðisumbætur og að kínversk stjórnvöld létu sjálfsstjórnarborgina afskiptalausa.
