Morgunblaðið | 7.11.2019 | 10:47 | Uppfært 11:49

Dæla 60 tonnum af fiski á klukkustund

Value Pump-dælan getur flutt 60 tonn af uppsjávarfiski á klukkustund. Prófanir fóru fram hér á landi í sumar. Ljósmynd/Skaginn 3X

Skoska sjávarútvegsfyrirtækið Denholm Seafoods hefur skrifað undir kaup á 16 tommu ValuePump frá Skaganum 3X, eftir nokkurra mánaða rannsóknar- og þróunarvinnu sem fyrirtækin stóðu saman að, segir í fréttatilkynningu frá Skaganum 3X.

Fram kemur að nýjasta hönnun Value Pump-dælunnar afkasti allt upp í 60 tonnum af uppsjávarfiski á klukkustund og flytur hún hráefni um 200 metra frá höfninni að vinnslu Denholm í gegnum 16 tommu rör.

Ragnar Arnbjörn Guðmundsson, svæðissölustjóri Skagans 3X, segir hönnun og þróun dælunnar hafa verið áskorun. „En afrakstur erfiðisins er hreinlega magnaður. […] Við höfum verið í þróunarvinnu undanfarna mánuði með Value Pump-dæluna og ég er virkilega stoltur að segja frá því að hún getur afkastað 60 tonnum á klukkustund og getur dælt hráefni upp á við um allt að 10 metra, allt eftir óskum kaupandans. Mikilvægast af öllu er það hversu vel dælan fer með hráefnið meðan á flutningi stendur, sem tryggir viðhald á gæðum hráefnisins.“

Bent er á í tilkynningu félagsins að dælan hafi verið framleidd hjá fyrirtækinu frá árinu 1994, en á síðasta ári hóf fyrirtækið rannsóknir og prófanir á nýrri og bættri hönnun og flytur hún hráefni í gegnum „lokað lágþrýstingslagnakerfi með lofti og vökva sem getur verið breytilegur, allt eftir tegund afurðar og hvaða virðisauka er óskað eftir meðan á flutningi stendur. Til að mynda er mögulegt að bæta við vökvahringrás, krapakerfi, varmaskiptum, pækilkerfi og fleiru til þess að ná fram virðisauka hráefnis.“

Freysteinn Nonni Mánason frá Skaganum 3X mun flytja erindi um 16 tommu Value Pump á Sjávarútvegsráðstefnunni í Hörpu sem sett var í morgun.