Morgunblaðið | 14.11.2019 | 11:05 | Uppfært 14:04

Erfiðara að styðjast við innflutt hráefni

Innflutt loðna hefur verið mikilvægur viðauki í starfsemi fiskvinnslu hér á landi. Á þessu ári og því næsta verða engar loðnuveiðar í Barentshafi. mbl.is/RAX

Vinnslustöðvar sem hafa unnið loðnu hafa sumar aflað hráefni með því að kaupa loðnu og loðnuhrogn til vinnslu hér á landi af erlendum skipum og aukið þau kaup þegar skort hefur hráefni. Í fyrra voru flutt inn tæp 70 þúsund tonn af loðnu til vinnslu sem var nokkuð meira en árið 2017 þegar flutt voru inn tæp 57 þúsund tonn. Árið 2016 voru aðeins flutt inn 22 þúsund tonn, en árið á undan voru þau rúm 86 þúsund.

Ekki er ljóst hvert umfang innflutnings á þessu ári verður en líklega mun það vera mjög takmarkað þar sem ekki hefur verið veidd loðna í Barentshafi auk þess sem hún var ekki veidd í íslenskri lögsögu. Staðan verður líklega svipuð fram á næsta ár þar sem rannsóknarleiðangrar í haust gáfu til kynna mælingar sem voru langt undir viðmiðunarmörkum. Þó fannst talsvert af ungri loðnu sem gefur von um að loðnukvóti verði gefinn út 2021.

Frétt af mbl.is

Frekar bjartsýnn á loðnuvertíð 2021

Á næsta ári munu vinnslustöðvar einnig hafa erindi sem erfiði í öflun hráefnis með innflutningi til þess að mæta innlendum skorti þar sem ekki mun verða veidd loðna í Barentshafi eins og á síðasta fiskveiðiári.

„Við höfum verið að kaupa af Norðmönnum sem hafa verið að veiða í íslenskri landhelgi á grundvelli þess kvóta sem þeir fá úthlutað í henni. Síðan höfum við verið að kaupa, eins og 2018, loðnu sem þeir veiða í Barentshafi. En núna er búið að gefa út að það verður ekki gefinn út kvóti í Barentshafi á næsta ári og var ekki 2019 heldur. Þá er það þannig að við getum ekki fengið neitt þarna sem við höfum nýtt til þess að bæta upp skort,“ segir Friðrik Mar Guðmundsson, framkvæmdastjóri Loðnuvinnslunnar.