Morgunblaðið | 20.11.2019 | 9:43 | Uppfært 10:24

Styðja aðgerðir stjórnvalda

Í yfirlýsingu segir Heiðrún Lind Marteinsdóttir, framkvæmdastjóri SFS, að samtökin munu leita leiða til þess að styðja aðgerðir stjórnvalda. mbl.is/Eggert

„Samtök fyrirtækja í sjávarútvegi (SFS) munu gera allt sem í þeirra valdi stendur til þess að styðja við stjórnvöld, þannig að innleiða megi tilhlýðilegar aðgerðir sem snerta fyrirtæki í sjávarútvegi,“ segir í tilkynningu frá SFS til fjölmiðla vegna ákvörðunar ríkisstjórnarinnar um að ráðast í aðgerðir til að auka traust á íslensku atvinnulífi.

Þá segir jafnframt að samtökin gera „kröfu til félagsmanna sinna um að stunda heiðarlega, gagnsæja og löglega starfshætti“.

Frétt af mbl.is

Sjö aðgerðir til að auka traust á atvinnulífinu

Í tilkynningunni eru orð SFS vegna umfjöllunar um starfsemi Samherja í Afríku í síðustu viku ítrekuð. „Íslensk fyrirtæki eiga að fylgja lögum, bæði heima og erlendis, og almennt að viðhafa góða viðskipta- og stjórnarhætti. Ásakanir á hendur fyrirtækinu eru alvarlegar og það er verkefni viðeigandi stjórnvalda að rannsaka og taka afstöðu til þeirra.“

Frétt af mbl.is

Geti haft áhrif á orðspor íslensks sjávarútvegs

SFS kveðst leggja áherslu á að vera fyrirmynd og í fremstu röð í heiminum þegar kemur að sjávarútvegi. „Á Íslandi er fiskveiðistjórnarkerfi sem er leiðandi á heimsvísu þegar litið er til sjálfbærrar nýtingar á fiskistofnum, auk þess sem samvinna sjávarútvegsfyrirtækja við íslensk iðn- og tæknifyrirtæki hefur aukið virði auðlindarinnar umtalsvert. Samvinnan hefur getið af sér nýja auðlind í formi hugvits og þekkingar.“

„Allt þetta gerir það að verkum að við gerum kröfur til sjávarútvegsins, bæði sem vinnuveitanda og útflutningsgreinar. Þar eru stjórnarhættir ekki undanskildir. Sjávarútvegurinn hefur stigið stór framfaraskref á undanförnum árum. Til dæmis í umhverfis- og loftslagsmálum, þar sem höfðað hefur verið til samfélagslegrar ábyrgðar fyrirtækja,“ segir að lokum.

Undir tilkynninguna ritar Heiðrún Lind Marteinsdóttir, framkvæmdastjóri SFS.