Morgunblaðið | 21.11.2019 | 13:08 | Uppfært 14:08

Uppsagnir hjá Hafró

Hafrannsóknastofnun við Skúlagötu. mbl/Arnþór Birkisson

Fjórum starfsmönnum Hafrannsóknastofnunar var sagt upp í morgun. Þrír þeirra eru sviðsstjórar og einn er sérfræðingur.

Umhverfissvið stofnunarinnar var einnig lagt niður og verður það að einhverju leyti sameinað öðrum sviðum.

Héðinn Valdimarsson, sviðsstjóri á umhverfissviði, staðfestir þetta í samtali við mbl.is, en hann er einn þeirra sem var sagt upp.

Fleiri uppsagnir eru fyrirhugaðar í dag en ekkert hefur verið gefið upp um á hvaða sviði þær verða eða hversu mörgum verður sagt upp.

„Við erum búin að vita af því að fjármögnun stofnunarinnar er verulega áfátt. Það hefur passað illa við loforð ríkisstjórnarinnar um að efla hafrannsóknir,“ segir hann, spurður hvort uppsagnirnar hafi komið honum í opna skjöldu.

Sviðsstjórarnir þrír sem um ræðir voru yfir uppsjávarsviði, gagna- og tölvusviði og umhverfissviði. Einnig var sérfræðingi sagt upp sem starfaði sem varaforstjóri og forstjóri stofnunarinnar fyrir sameiningu Hafró og Veiðimálastofnunar.