Morgunblaðið | 22.11.2019 | 18:35

Þorsteinn Már hættir í stjórn Nergård

Þorsteinn Már Baldvinsson hefur sagt sig úr stjórn norskrar stórútgerðar, Nergård, sem Samherji á 40% hlut í. mbl.is/Hari

Þorsteinn Már Baldvinsson hefur sagt sig úr stjórn Nergård, norsks útgerðarfyrirtækis. Samherji á 40% hlut í Nergård sem er eitt stærsta sjávarútvegsfélag Noregs.

Sonur Þorsteins, Baldvin Þorsteinsson, mun áfram sitja í stjórninni, að því er fram kemur á norskra viðskiptamiðlinum E24. Haft er eftir Tommy Torvanger, forstjóra Nergård, að engar breytingar verði gerðar á stjórninni. Stjórnarmenn verði fjórir í stað fimm með brotthvarfi Þorsteins.

Auk þess að hafa vikið tímabundið sem forstjóri Samherja hefur Þorsteinn sagt sig úr ýmsum stjórnum, til að mynda stjórn Framherja í Færeyjum og stjórn Síldarvinnslunnar, eftir að greint var frá starfsháttum Samherja félagsins í Namibíu og meintra mútugreiðslna.