Morgunblaðið | 23.11.2019 | 19:39 | Uppfært 20:37

Vilja ræða við Samherjamenn og samvinnu við yfirvöld

Paulus Noa, framkvæmdastjóri ACC, spillingarlögreglu Namibíu, segist vilja ná tali af eigendum Samherja á næstunni. Þorsteinn Már Baldvinsson, einn af eigendnum Samherja sem nýlega hætti tímabundið sem forstjóri, er hér fremstur á myndinni. mbl.is/Hari

Þremenningarnir sem ACC, spillingarlögreglan í Namibíu, leitar enn að eftir að Bernhard Esau, fyrrverandi sjávarútvegsráðherra landsins, var handtekinn í dag, eru hákarlarnir þrír svokölluðu, en þeir mynduðu ásamt Esau kjarnann í hópi þeirra valdamanna sem talið er að hafi tekið við mútugreiðslum frá Samherja fyrir ódýrt aðgengi að hrossamakríl. Þetta sagði Paulus Noa, framkvæmdastjóri ACC, í kvöldfréttum RÚV.

Hákarlarnir þrír eru þeir James Hatuikulipi, fyrrverandi stjórnarformaður ríkisútgerðarfélagsins Fishcor, Sacky Shanghala, fyrrverandi dómsmálaráðherra Namibíu, og Tamson Hatuikulipi, tengdasonur Esau og náfrændi James.

Frétt af mbl.is

Fyrrverandi ráðherra í Namibíu handtekinn

James Hatuikulipi hefur sagt af sér stjórnarformennsku í Fischor, ríkisreknu sjávarútvegsfyrirtæki Namibíu. Ljósmynd af vef Seaflower

Þá kom einnig fram í máli Noa á RÚV að samkvæmt vísbendingum lögreglunnar séu tveir þeirra sem leitað er að enn í landinu. Í síðustu viku greindi namibíski miðillinn The Namibian frá því að þeir Tamson Hatuikulipi og Sacky Shanghala hafi nýverið farið til Höfðaborgar í Suður-Afríku og ekki snúið aftur til Namibíu. Noa sagði við RÚV að handtaka mannanna væri óumflýjanleg. Eignir þeirra voru frystar í síðustu viku vegna rannsóknarinnar.

Sacky Shanghala, fyrrverandi dómsmálaráðherra Namibíu (t.v.), ásamt Jóhannesi Stefánssyni, uppljóstrara og þáverandi starfsmanni Samherja, árið 2014. Ljósmynd/Wikileaks

Vonaðist Noa einnig eftir góðri samvinnu við íslensk stjórnvöld við rannsóknina og að ná tali af eigendum Samherja, eða starfsmönnum fyrirtækisins sem gætu aðstoðað við rannsóknina.