Morgunblaðið | 28.11.2019 | 11:18 | Uppfært 16:36

31% færri slys á sjó hjá Brimi

Slysum hefur fækkað milli ára hjá Brimi. Forvarnir eru sagðar mikilvægar. Ljósmynd/Borgar Björgvinsson

Slys á sjó hafa verið 18 hjá Brimi hf. það sem af er ári og eru það 8 færri en allt árið í fyrra þegar þau voru 26 og hefur þeim því fækkað um 31% milli ára, að því er fram kemur á vef Brims hf. Þar kemur fram að talsverðar sveiflur hafi verið í fjölda slysa frá árinu 2016 en þá voru þau 24 og 17 árið 2017. Að meðaltali voru slys á sjó 21 á tímabilinu.

Ef litið er til slysa á landi hafa þau verið 31 það sem af er ári sem er 52% færri borið saman við 2018 þegar þau voru 65. Tekið er fram á vef Brims að þessar tölur nái einnig til slysa sem eiga sér stað þegar starfsmenn eru á leið til og frá vinnu.

Tölurnar voru kynntar á árlegum öryggisfundi Brims sem haldinn var í gær og sóttu öryggisnefndir vinnustaða bæði til sjós og lands auk skipstjórnarmanna og yfirmanna félagsins fundinn.

Greint var frá öryggisverkefnum á fundinum sem flest fela í sér að efla forvarnir og fræðslu. „Þá var fjallað um fyrirkomulag skráninga slysa og hættulegra atvika en hjá félaginu er lögð áhersla á traustar upplýsingar til að tryggja nákvæmar greiningar sem eru nauðsynlegar öllum forvörnum,“ segir á vef félagsins.