Morgunblaðið | 10.12.2019 | 10:47

Eignarhald Hjálmars og Guðmundar aðskilið

Fjárhagsleg tengsl bræðranna Hjálmars og Guðmundar Kristjánssona hafa verið rofin og eignarhald þeirra í Brimi aðskilið. mbl.is/Hari

Samhliða því að KG Fiskverkun, í eigu Hjálmars Kristjánssonar, keypti 46,6 milljónir hluta í Brimi af Guðmundi Kristjánssyni, forstjóra Brims, á 1,77 milljarða króna, keypti Útgerðarfélag Reykjavíkur (ÚR) alla hluti í eigu KG Fiskverkunar í eignarhaldsfélaginu Kristján Guðmundsson ehf. sem á um 37% hlut í ÚR.

Með viðskiptunum hafa fjárhagsleg tengsl bræðranna Hjálmars og Guðmundar verið rofin og eignarhald þeirra í Brimi aðskilið, að því er segir í fréttatilkynningu frá ÚR. Þá mun Hjálmar ekki hafa neina eignaraðild að ÚR og mun hverfa frá öllum stjórnunarstörfum í félaginu.

Frétt af mbl.is

Birta endanlega dagskrá hluthafafundar Brims

„Í framhaldi af tilkynningu til kauphallar í fyrir fáeinum dögum um viðskipti Útgerðarfélags Reykjavíkur hf. (ÚR) og KG fiskverkunar ehf. á Rifi með hlutabréf í Brimi hf. er ástæða til að greina frá að ÚR keypti jafnframt 33,3% hlut KG fiskverkunar í eignarhaldsfélaginu Kristján Guðmundsson ehf. sem á um 37% hlut í ÚR,“ segir í tilkynningu ÚR.

„Eftir þessi viðskipti á Hjálmar Kristjánsson enga eignaraðild að ÚR og hverfur frá öllum stjórnunarstörfum í félaginu. Þar með eru rofin fjárhagsleg tengsl á milli bræðranna Guðmundar og Hjálmars Kristjánssona. Eignarhald félaga þeirra bræðra á hlutafé í Brimi hf. er aðskilið. ÚR og tengd félög fara nú með um 46,26% af heildarhlutafé í Brimi.“

Hluthafafundur í Brimi verður haldinn á fimmtudag 12. desember.