Aftakaveðrið sem spáð er um allt land þegar líða fer á daginn hefur áhrif á flugsamgöngur og ferjusiglingar.
Herjólfur fór frá Vestmannaeyjum í morgun og mun sigla til Þorlákshafnar. Þaðan siglir Herjólfur klukkan 10:45 en seinni ferð dagsins fellur niður vegna fyrirhugaðra lokana á vegum til og frá höfuðborgarsvæðinu. Báðar ferðir ferjunnar Baldurs milli Stykkishólms og Brjánslækjar falla einnig niður.
Baldur: Vegna slæmrar veðurspár falla báða ferðir ferjunnar Baldurs niður í dag. #færðin
— Vegagerðin | Iceland Roads (@Vegagerdin) December 10, 2019
Innanlandsflug hófst samkvæmt áætlun í morgun en öllu flugi hefur verið aflýst eftir klukkan 10.
Einnig má búast við mikilli röskun á millilandaflugi í dag og á morgun vegna veðurs og Reykjanesbraut verður mögulega lokað frá hádegi í dag til hádegis á morgun. Icelandair hefur aflýst öllum brottförum frá klukkan 14. Þá hafa EasyJet, Transavia og Norwegian einnig aflýst brottförum síðdegis. Vél Wizz Air til Gdansk klukkan 21:55 er eina brottförin sem enn er á áætlun.
Isavia bendir flugfarþegum á að fylgjast með uppfærslum á flugtímum á heimasíðu Isavia en frekari upplýsingar má nálgast hjá flugfélögum.
Fréttin hefur verið uppfærð.