Lögreglan á Norðurlandi vestra hefur birt á Facebook-síðu sinni skömmtunaráætlun rafmagns frá RARIK fyrir Sauðárkrók.
„Minnum fólk á að fara sparlega með rafmagn, t.d. jólaljós og annað sem má bíða betri tíma. Höldum okkur heima enn um sinn,“ skrifar lögreglan.
Bilun hefur verið á rafmagnslínunni til Sauðárkróks og skammtað í bænum frá því óveðrið skall á í gær.
Á vefsíðu RARIK kemur fram að tvær varavélar séu keyrðar í bænum en virkjunin sem er staðsett þar er biluð. Þess vegna annar varaaflið bara hluta af bænum. Bilun á línunni hefur ekki fundist.
Rafmagnslaust hefur verið á Dalvík, Ólafsfirði og Siglufirði frá því í morgun þegar Dalvíkurlína fór út. Hún er illa farin og tekur nokkra daga að gera við hana.
Rafmagnslaust er á Grenivík og á Gálmaströnd, auk þess sem 10 til 15 rafmagnsstaurar eru brotnir norðan við Kópasker.
Einnig er enn rafmagnslaust í V-Húnavatnssýslu.