Morgunblaðið | 13.12.2019 | 8:30

Tíu fyrirtæki með 52% aflaheimilda

Greinendur Íslandsbankan telja að stærri félög, sem hafa aflaheimildir í fleiri tegundum fiskistofna, séu betur í stakk búin að takast á við rekstrarsveiflur. mbl.is/Þorgeir Baldursson

Aukin samþjöppun í sjávarútveginum hefur stuðlað að „meiri hagkvæmni í rekstri, aukinni framleiðni og bættri arðsemi félaganna,“ að því er fram kemur í greiningu Íslandsbanka á íslenskum sjávarútvegi. Hins vegar er einnig bent á að hún hafi einnig leitt af sér aukna skuldsetningu.

„Eftir að núverandi kvótakerfi var innleitt árið 1984 og aflaheimildir urðu að fullu framseljanlegar árið 1991 hefur verið sterk tilhneiging í átt að sameiningu útgerða í íslenskum sjávarútvegi. Hefur þetta reynst grundvöllur aukinnar hagræðingar í greininni líkt og greina má í rekstrartölum fyrirtækja yfir áðurgreint tímabil,“ segir í greiningunni.

Er það mat greinenda bankans að stærri félög, sem hafa aflaheimildir í fleiri tegundum fiskistofna, séu betur í stakk búin að takast á við rekstrarsveiflur.

Þá segir að 50 stærstu sjávarútvegsfyrirtækin hafi verið með 89% af úthlutuðum aflaheimildum í upphafi fiskveiðiársins 2019/2020 og að tíu stærstu fyrirtækin hafi verið með 52% úthlutaðra aflaheimilda.