Hvítur, hvítur dagur nær ekki Óskarstilnefningu

Kvikmynd Hlyns Pálmasonar, Hvítur, hvítur dagur er ekki á stuttlista Akademíunnar fyrir Óskarsverðlaunin á næsta ári. Í gær var tilkynntur stuttlisti fyrir tilnefningar til verðlaunanna og listinn yfir erlendar kvikmyndir styttur niður í tíu kvikmyndir. 

91 kvikmynd kom til greina við valið á listanum og að þessu sinni komst sú íslenska ekki á blað. Á listanum eru átta af tíu frá Evrópu. Endanlegar tilnefningar verða svo tilkynntar 13. janúar á næsta ári, en Óskarinn verður haldinn í 92. skipti 9. febrúar.

Frétt af mbl.is

Hildur færist nær Óskarstilnefningu

Tónskáldið Hildur Guðnadóttir er enn í kapphlaupinu um Óskarinn fyrir tónlist sína í kvikmyndinni Joker. Förðunarfræðingurinn Heba Þórisdóttir er einnig á stuttlistanum fyrir förðun, en hún sá um förðun fyrir kvikmyndina Once Upon a Time in Hollywood.

Myndirnar sem til greina koma

• Tékkland: Skræpótti fuglinn
• Eistland: Sannleikur og réttlæti
• Frakkland: Vesalingarnir
• Ungverjaland: Þau sem eftir lifðu
• Norður-Makedónía: Hunangslandið
• Pólland: Corpus Christi
• Rússland: Baunastöng
• Senegal:  Atlantsfólkið
• Suður Kórea: Sníkjudýrin
• Spánn: Kvöl og heiður