Ríkisstjórnin samþykkti á fundi sínum í morgun að veita Slysavarnafélaginu Landsbjörg 15 milljóna króna styrk af sameiginlegu ráðstöfunarfé sínu. Þetta kemur fram í tilkynningu frá Stjórnarráðinu.
Segir að styrkurinn sé veittur í viðurkenningar- og virðingarskyni í kjölfar þess óeigingjarna starfs sem sjálfboðaliðar sveitarinnar hafi unnið í aftakaveðrinu sem gekk yfir landið fyrr í mánuðinum. Þar hafi sveitirnar enn og aftur sýnt hve gríðarmikilvægar þær eru öryggi landsmanna.
Fetar ríkisstjórnin þar með í fótspor sveitarstjórna á Norðurlandi, sem hafa styrkt björgunarsveitir sinna heimabyggða í kjölfar óveðursins.