Forsætisráðherrann skilur reiði fólks
Setja bókamerki
Scott Morrison, forsætisráðherra Ástralíu, hefur beðist afsökunar á því að hafa valdið „miklum kvíða“ með því að fara í frí á meðan gróðureldar geisuðu heima fyrir. Einn lét lífið í gær og eins er saknað.
Alls hafa níu látið lífið og tæplega 800 heimili eyðilagst það sem af er vegna eldanna. Ástandið er verst í fylkinu New South Wales (NSW) en þar er Sydney stærsta borgin.
Eins og áður hefur komið fram kom Morrison fyrr heim úr fjölskyldufríi til Hawai í lok síðustu viku eftir að hafa verið harðlega gagnrýndur fyrir að fara á meðan meðan kjarreldar og hitabylgja ógna lífi og eignum fjölmargra Ástrala.
„Ég skil það vel að fólk hafi verið ósátt við fríið mitt á meðan margir voru undir miklu álagi hér,“ sagði Morrison í dag.
Hann ræddi við slökkviliðsmenn og bað þá afsökunar á fríinu.
Forsætisráðherrann hefur verið gagnrýndur fyrir úrræðaleysi gagnvart eldunum og einnig fyrir aðgerðarleysi vegna loftslagsbreytinga. Hann viðurkenndi að loftslagsbreytingar hefðu áhrif á hækkandi hitastig í landinu en sagði breytingarnar ekki hafa bein áhrif á skógareldana.
Vísindamenn hafa varað við því að mikill hiti og þurrkur geti orðið til þess að skógareldar í Ástralíu verði tíðari og stærri. Hitinn í landinu hefur farið í rétt tæpar 50 gráður á síðustu dögum og sums staðar hefur ekki rignt í marga mánuði, jafnvel heilt ár.
Shane Fitzsimmons, slökkviliðsstjóri í NSW, sagði að gærdagurinn hefði verið afar slæmur og að ástandið myndi ekki batna á næstunni.
