Morgunblaðið | 6.1.2020 | 15:49 | Uppfært 27.5.2020 16:20

Gleði að sjá „stóru vængina“

„Þetta er náttúrlega fyrst og fremst bara gleði að sjá hversu stóra vængi hún er komin með,“ segir Lárus Jóhannesson í 12 tónum um Hildi Guðnadóttur sem hlaut Golden Globe-verðlaunin í nótt. 12 tónar gáfu út fyrstu plötu Hildar árið 2006 en hún fór einsömul út á land í viku til að taka hana upp.

Platan sem nefnist Mount A kom út undir merkjum 12 tóna en Lárus segir marga af kynslóð Hildar hafa verið fastagesti í búðinni eftir að hún var opnuð árið 1998. Hann nefnir Örvar Þóreyjarson Smárason og tvíburasysturnar í Múm þær Kristínu Önnu og Gyðu Valtýsdætur auk margra annarra. Markmiðið hafi ávallt verið að gefa líka út plötur og því var stokkið á tækifærið að vinna með Hildi, sem þá kallaði sig Lost in hildurness.

Frétt af mbl.is

Saga Jókersins veitti Hildi innblástur

Í myndskeiðinu rifjar Lárus upp þegar Hildur fór út á land árið 2006 til að taka upp plötuna sem markaði upphafið að farsælum ferli hennar. Lárus vann einnig náið með Jóhanni Jóhannssyni sem hlaut Golden Globe-verðlaun fyrir tónlistina í kvikmyndinni The Theory of Everything frá árinu 2015.