Fyrirhugað er að manna lokunarpósta beggja vegna við Hellisheiði um klukkan 11. Gera má ráð fyrir að veginum verði lokað skömmu síðar, en það veltur á veðri og færð, samkvæmt upplýsingum frá lögreglunni á Suðurlandi. Óvíst er hversu lengi sú lokun muni standa yfir. Vegagerðin ætlar að reyna eftir fremsta megni að halda Þrengslavegi opnum en það veltur á veðrinu hvernig það muni ganga.
Einar Sveinbjörnsson, veðurfræðingur Vegagerðarinnar, segir að mjög djúp lægð komi hratt upp að Reykjanesi. Veður og færð geta spillst mjög snögglega nærri hádegi. Sunnan- og suðvestanlands gengur í SA 18-25 m/s, slydda í byggð en hríð og kóf á Hellisheiði og víðar. Hann segir að óveðrið standi stutt á þessum slóðum en bresti á í öðrum landshlutum eftir miðjan dag.
Á Suðurlandi tekur appelsínugul viðvörun gildi á hádegi og gildir til klukkan 15. „Austanhríð með vindhraða á bilinu 18 til 25 m/s. Einnig er spáð talsverðri eða mikilli snjókomu með lélegu skyggni og versnandi akstursskilyrðum. Búast má við samgöngutruflunum og lokunum á vegum. Fólki bent á að sýna varkárni og fylgjast með veðurspám. Ekkert ferðaveður er á meðan viðvörunin er í gildi.“
Frá klukkan 15 til klukkan 20 verður gul viðvörun í gildi á Suðurlandi. „Suðaustan- og sunnanhvassviðri eða -stormur, 15 til 23 m/s, hvassast við ströndina. Varasamt fyrir ökutæki sem taka á sig mikinn vind. Afmarkaðar samgöngutruflanir líklegar og lokanir á vegum. Fólk er hvatt til að sýna aðgát og ganga frá lausum munum til að forðast tjón.“
Samkvæmt upplýsingum frá Vegagerðinni verður væntanlega lýst yfir óvissustigi á Mosfellsheiði auk Hellisheiðar vegna veðurs frá klukkan 11. Varað er við miklum hviðum undir Kjalarnesi frá kl: 13:00 og fram undir kvöld. Búið er að opna Ísafjarðardjúp þar er snjóþekja og unnið að mokstri. Ófært er á Klettshálsi en mikill snjór er á Klettshálsi og því tekur mokstur langan tíma. Búið er að opna Súðavíkurhlíð. Búið er að opna veginn um Þverárfjall en það er ennþá er unnið við mokstur.