Morgunblaðið | 10.1.2020 | 20:00 | Uppfært 22:19

Ökumennirnir enn á gjörgæslu

Ekki liggur fyrir hvað olli því að gámurinn losnaði af vöruflutningabifreiðinni. mbl.is/Eggert Jóhannesson

Ökumenn tveggja bifreiða sem urðu fyrir ruslagámi sem losnaði af vöruflutningabifreið í Kollafirði fyrir hádegi í dag eru enn á gjörgæslu. Ekki er vitað hvað olli því að gámurinn losnaði af flutningabifreiðinni.

Valgarður Valgarðsson, aðalvarðstjóri hjá lögreglunni á höfuðborgarsvæðinu, segist í samtali við mbl.is ekki geta staðfest hvort líðan ökumannanna sé stöðug, en að þeir séu enn á gjörgæslu. Greint var frá því í dag að annar væri með alvarlega höfuðáverka en hinn með annars konar áverka, ekki jafn alvarlega.

Frétt af mbl.is

Vesturlandsvegur opinn á ný – Tveir á gjörgæslu

Að sögn Valgarðs verður rannsakað hvað olli því að gámurinn losnaði af vöruflutningabifreiðinni, en gámurinn lenti á öðrum vörubíl og lítilli fólksflutningabifreið sem komu úr gagnstæðri átt.

Um það bil tvo klukkutíma tók að hreinsa veginn, en það var gert í leiðindaveðri og höfðu langar bílaraðir myndast á Vesturlandsvegi beggja vegna við slysstað.