Morgunblaðið | 10.1.2020 | 16:40 | Uppfært 17:10

Rafmagnstruflanir á Norðurlandi

Gert við aðveitustöð RARIK við Sauðárkrók í óveðrinu í desember á síðasta ári. Ljósmynd/Birgir Bragason

Rafmagnstruflun er nú í gangi í landskerfi RARIK á Dalvík, Ólafsfirði, Siglufirði og Grenivík.

Samkvæmt vefsíðu RARIK er nú unnið að því að bæta úr trufluninni, en ekki hafa fengist frekari upplýsingar. Þá segir á vefsíðunni að truflunin hafi hafist um klukkan 15 síðdegis í dag og á að vera lokið um klukkan 19.

Sigurður Ægisson, fréttaritari mbl.is á Siglufirði, segir að rafmagnsleysið hafi komið til mjög skyndilega. Ekkert sé að veðri á svæðinu, en ekki sé útilokað að frostleysi í fyrsta sinn í nokkurn tíma hafi haft áhrif. Þá segir hann að samkvæmt starfsmanni RARIK á svæðinu eigi rafmagnið að vera aftur komið á innan skamms, en það sé þegar komið á á Ólafsfirði.