Morgunblaðið | 12.1.2020 | 8:35 | Uppfært 12:38

Veðrið að versna á Vestfjörðum

Skjáskot af vef Veðurstofu Íslands.

Veðrið er að versna mjög á Vestfjörðum og að sögn varðstjóra í lögreglunni á Ísafirði er verið að fara yfir stöðu mála. Hugsanlega þarf að loka einhverjum leiðum en vegurinn um Súðavíkurhlíð er opinn. Þar er aftur á móti varúðarstig vegna hugsanlegra snjóflóða.

Truflanir hafa verið á rafmagni á Vestfjörðum og keyrt á varaafli í Bolungarvík. Í nótt leysti Mjólkárlína út í annað sinn.

Hálka og snjóþekja er víðast hvar á Vestfjörðum og sums staðar þæfingur. Einnig snjóar víða. Ófært er á Gemlufallsheiði. Flughálka er á Innstrandavegi.

Búist er við hríð á Vestfjörðum og Norðurlandi í dag og stormi víða um land seint á morgun. Á Vestfjörðum tók gul viðvörun gildi klukkan 6 í morgun og gildir til klukkan 17. „Norðaustan 15-23 m/s með snjókomu og skafrenningi og mjög lélegu skyggni, einkum norðan til. Samgöngutruflanir eru líklegar.“

Síðan er gul viðvörun á Vestfjörðum frá klukkan 13 á morgun þangað til klukkan 19 á þriðjudag. „NA 20-25 með éljum og skafrenningi og jafnvel snjókomu um tíma norðan til. Miklar líkur á samgöngutruflunum og ekkert ferðaveður.“