Morgunblaðið | 13.1.2020 | 5:59

180 gista í fjöldahjálparmiðstöð

Um 180 manns gistu í fjöldahjálparmiðstöðinni í nótt. Ljósmynd Rauði krossinn

Um 180 sváfu í fjöldahjálparmiðstöð Rauða krossins í íþróttahúsinu við Sunnubraut í Reykjanesbæ í nótt en alls komu um 500 manns í hjálparmiðstöðina segir Jón Brynjar Birgisson, sviðsstjóri innanlandssviðs hjá Rauða krossinum. Hann segir að fólk hafi ekki verið skelkað en mjög þreytt.

Rauði krossinn opnaði fjöldahjálparmiðstöð í Reykjanesbæ í gærkvöldi. Ljósmynd Rauði krossinn

Hann segir að flestir séu sofandi en um fólk er að ræða sem er á leið í flug frá Keflavíkurflugvelli.

Fjöldahjálparmiðstöðin var opnuð um klukkan 21 í gærkvöldi vegna ástandsins á Reykjanesbraut og þeir sem komu þangað fyrst var fólk sem var fast á leiðinni til og frá flugvellinum. Þegar Reykjanesbrautin opnaði að nýju fóru margir af stað leiðar sinnar á höfuðborgarsvæðið. Þegar leið á kvöldið fóru síðan að koma rútur með fólk ofan úr flugstöð eftir að hægt var að hleypa fólki frá borði flugvéla en margir sátu klukkustundum saman úti í vél þar sem óveðrið kom í veg fyrir að hægt væri að afferma vélarnar.

Fjöldahjálparmiðstöð Rauða krossins. Ljósmynd Rauði krossinn

Að sögn Jóns Brynjars tók fólk ástandinu mjög vel en var eðlilega þreytt. Hann á von á því að fólk fari að fara á fætur því flug virðist vera á áætlun frá Keflavíkurflugvelli.