Morgunblaðið | 13.1.2020 | 18:03 | Uppfært 19:35

Iðnaðarhúsnæði rýmt vegna snjóflóðahættu á Ísafirði

Búið er að rýma reit 9 sem sést hér á myndinni, en hann er undir Seljalandshlíð. Þar er iðnaðarhúsnæði. Kort/Veðurstofa Íslands

Hættustigi vegna snjóflóða hefur verið lýst yfir á Ísafirði og kl. 16 í dag voru hús á rýmingarreit númer 9 þar í bæ rýmd. Reiturinn sem um ræðir er undir Seljalandshlíð og þar er einungis iðnaðarhúsnæði, engin íbúðarhús.

Fram kemur á vef Veðurstofu Íslands að veðuraðstæður hafi verið þannig síðustu daga að talsverður snjór hafi safnast í fjöll, snjór sem sé mjög lagskiptur, en óvissustig vegna snjóflóða er í gildi á norðanverðum Vestfjörðum. Áfram verður norðaustanhríð og mjög hvasst, sérstaklega í kvöld og á morgun, þriðjudag.

Frétt af mbl.is

Óvissustigið á við um örfá hús

„Búast má við því að snjóflóð falli í þessu veðri og geta þau orðið nokkuð stór,“ segir á ofanflóðabloggsíðu Veðurstofunnar, en þar segir einnig að líklega hafi snjóflóð fallið ofan í lóð Reiðhjallavirkjunar í Syðridal inn af Bolungarvík í hádeginu í dag.

„Orkubú Vestfjarða tilkynnti að þá hafi hækkað í lóninu um 40 cm, og er það þekkt afleiðing snjóflóða úr hlíðinni ofan lónsins. Ekki er vitað um önnur snjóflóð á svæðinu síðasta sólarhringinn en flestir vegir hafa verið lokaðir og lítið skyggni er til fjalla og því er ólíklegt að fréttist af flóðum,“ segir á vef Veðurstofunnar.