Morgunblaðið | 13.1.2020 | 16:30

„Það er komið nóg!“

Frá Reykjanesbraut í gær. Ljósmynd/Vegagerðin

„Hversu mörg banaslys verða þangað til einhver ráðamaður vaknar, tekur raunverulegar ákvarðanir og lætur verkin tala?“

Þessa spyr framkvæmdahópur Stopp-hópsins svokallaða, sem berst fyrir umbótum á Reykjanesbraut. Karlmaður á fimmtugsaldri lést í hörðum árekstri fólksbíls og snjóruðningstækis á Reykjanesbraut, á móts við álverið í Straumsvík, í gærkvöldi. Að mati hópsins er vegkaflinn einn sá hættulegasti á landinu.

Frétt af mbl.is

Lést í árekstri fólksbíls og snjóruðningstækis

Í tilkynningu frá hópnum, sem ber yfirskriftina „Það er komið nóg!!!“, segir að nú sé nóg komið og óskar hópurinn eftir fundi með fulltrúum álversins í Straumsvík, Hafnarfjarðarbæjar og Vegagerðarinnar á miðvikudag. Vegagerðin hefur staðfest mætingu á fundinn.

„Í gær gerðist allt sem við höfum undanfarið hræðst, rúmlega 10.000 manns innlyksa vegna lokunar Reykjanesbrautar. Enginn virðist hafa áhuga og allir aðilar málsins benda hver á annan,“ segir í tilkynningu hópsins.

Þá hefur hópurinn einnig óskað eftir fundi með Sigurði Inga Jóhannssyni, samgöngu- og sveitarstjórnarráðherra.