Morgunblaðið | 15.1.2020 | 13:50

„Því miður er veðurútlit ekki sérstaklega gott“

Árni friðriksson mun ásamt öðrum skipum hefja leit að loðnu í kvöld en ekki er mikil bjartsýni hvað loðnuvertíð varðar. mbl.is/Pétur Kristjánsson

Árni friðriksson, rannsóknaskip Hafrannsóknastofnunar, kom til Neskaupstaðar í morgun, en þangað er einnig kominn Hákon EA auk grænlenska skipsins Polar Amaroq, að því er fram kemur á heimasíðu Síldarvinnslunnar.

Skipin þrjú, ásamt Bjarna Ólafssyni AK og Ásgrími Halldórssyni SF, stefna á að halda í loðnuleiðangur í kvöld, en um tíma var tvísýnt með hann eða þar til nýverið þegar náðist samkomulag milli Hafrannsóknastofnunar og útgerðanna.

Frétt af mbl.is

Hafró greiðir helming kostnaðar

„Því miður er veðurútlit ekki sérstaklega gott en það er veðurgluggi næstu daga sem þarf að nýta vel. Því miður ríkir ekki mikil bjartsýni um loðnuvertíð en það er aldrei að vita. Loðnan hefur oft komið mönnum á óvart,“ er haft eftir Birki Bárðason, leiðangursstjóra, á vef Síldarvinnslunnar.

„Við þurfum að kvarða mæla í Árna Friðrikssyni og Hákoni en mælar Polar Amaroq hafa þegar verið kvarðaðir. Í kvörðun mælanna felst að þeir séu stilltir þannig að þeir mæli allir eins. Bjarni Ólafsson og Ásgrímur Halldórsson koma með sem leitarskip en þau eru ekki með kvarðaða mæla. Það eru því fimm skip sem hefja mælingar og leit í kvöld eða nótt. Við gerum ráð fyrir að byrja út af Litladýpi og leita norður með landgrunnsbrúninni og einnig á landgrunninum. Saman munu skipin leita út af Austfjörðum og Norðausturlandi í fyrstu atrennu. Um borð í bæði Polar Amaroq og Hákoni verða þrír starfsmenn frá Hafrannsóknastofnun,“ útskýrir Birkir.