Morgunblaðið | 16.1.2020 | 11:30

„Óbreytt ofveiði mun hafa ófyrirséðar afleiðingar“

Virginijus Sinkevičius, framkvæmdastjóri sjávarútvegsmála ESB, og Kristján Þór Júlíusson, landbúnaðar- og sjávarútvegsráðherra, í Brussel í dag. Ljósmynd/Stjórnarráðið

Kristján Þór Júlíusson, sjávarútvegs- og landbúnaðarráðherra, fundaði með Virginijus Sinkevičius, framkvæmdastjóra sjávarútvegsmála Evrópusambandsins, í Brussel í dag, að því er segir á vef stjórnarráðsins. Þar segir að staðan í samningaviðræðum strandríkjanna í makríl, kolmunna og norsk-íslenskri síld auk annarra deilistofna í Norður Atlantshafi hafi verið rædd.

„Á fundinum greindi ég frá því að ég hefði gefið samninganefnd Íslands þau fyrirmæli að við myndum beita okkur fyrir því að koma þessum viðræðum aftur af stað hið fyrsta. Það er allra hagur að þær viðræður skili árangri,“ er haft eftir Kristján Þór á vef stjórnarráðsins.

Frétt af mbl.is

Enn utan samkomulags um makrílinn

Bendir stjórnarráðið á að enginn heildstæður samningur er í gildi um stjórn veiða úr stofnunum og veitt er langt umfram ráðgjöf vísindamanna, og að Kristján Þór hafi lagt áherslu á að koma á samkomulagi sem fylgir þeirri ráðgjöf. „Ég lagði ríka áherslu á það náist sem fyrst samkomulag í samningaviðræðum strandríkjanna í deilistofnum. Óbreytt ofveiði úr þessum stofnum mun hafa ófyrirséðar afleiðingar og grafa undan orðspori samningsaðila sem ábyrgra fiskveiðiþjóða,“ segir ráðherrann.

Frétt af mbl.is

„Norðmenn sem hafa staðið í vegi fyrir samstarfi“

Þá voru einnig rædd samskipti Íslands og Evrópusambandsins á sviði sjávarútvegsmála og kom Kristján Þór á framfæri sjónarmiðum íslenskra stjórnvalda hvað varðar afnám tolla á íslenskum sjávarafurðum. Sagði hann það stórt hagsmunamál fyrir Ísland en um leið Evrópusambandið í ljósi aukinnar fiskneyslu innan sambandsins.