Morgunblaðið | 24.1.2020 | 15:34 | Uppfært 16:03

Lögregluþjónn handtekinn í Namibíu

Þrír hafa nú alls verið handteknir fyrir að hjálpa sexmenningunum, sem hafa verið í varðhaldi vegna rannsóknar namibísku spillingarlögreglunnar á Samherjaskjölunum, með einhverjum hætti. Mynd frá Windhoek, höfuðborg Namibíu. Hún tengist fréttinni ekki með beinum hætti. AFP

Namibískur lögregluþjónn á fimmtugsaldri hefur verið handtekinn af namibísku spillingarlögreglunni ACC, í tengslum við tilraun til mútugreiðslna sem leiddu til handtöku annars manns í vikunni.

Reynt var að múta rannsóknarlögreglumanni ACC til þess að láta af hendi greiðslukort tveggja af þeim sex sem setið hafa í varðhaldi frá því fyrir jól. Namibíski fjölmiðillinn Namibian greinir frá þessu í dag, en í frétt miðilsins er tiltekið að sá handtekni sé í varaliði lögreglu og ekki í fullu starfi sem lögreglumaður.

Frétt af mbl.is

Reynt að múta rannsakanda í Namibíu

Einn var handtekinn vegna þessa máls á þriðjudaginn og hafa því í heildina þrír verið handteknir vegna tilrauna sexmenninganna, sem setið hafa í varðhaldi í Namibíu frá því í desember, til þess að reyna að fela slóð sína.

Auk þeirra tveggja sem handteknir hafa verið í vikunni var starfsmaður Sacky Shanghala fyrrverandi dómsmálaráðherra landsins handtekinn um miðjan desember fyrir tilraun til þess að fjarlægja gögn af heimili yfirmanns síns.