Morgunblaðið | 4.2.2020 | 14:00 | Uppfært 14:30

Loðnuvertíð gæti aukið hagvöxt umtalsvert

Komast loðnunætur í notkun gæti það aukið hagvöxt um 0,5%. mbl.is/Hanna Andrésdóttir

Loðnuvertíð gæti skilað um 0,5 prósentum hærri hagvexti í ár, en vertíðin er háð því að loðna finnist í nægilegu magni í febrúarleiðangri Hafrannsóknastofnunar, að því er fram kemur í færslu á vef stjórnarráðsins. Þar segir jafnframt að loðnubrestur geti orðið til þess að hagvaxtarhorfur versni um allt að 0,2 til 0,3 prósent.

Þrátt fyrir að loðna hafi ekki fundist í nægilegu magni til þessa er ekki öll von úti og eru fordæmi fyrir því að kvóti hafi verið margfaldaður í kjölfar leitar í febrúar, til að mynda árið 2017.

Frétt af mbl.is

Segir ekki útilokað að meiri loðnu sé að finna

„Árin 2016-18 nam útflutningsverðmæti loðnu að meðaltali um 18 ma.kr. Aðeins útflutningsverðmæti þorsks var meira, eða 95 ma.kr. Árið 2019 var engin loðna veidd en útflutningsverðmæti birgða nam ríflega 8 ma.kr,“ segir í færslunni. En þar er bent á að „sambærileg loðnuvertíð og árin 2016-18 myndi skila um 0,5 prósentum meiri hagvexti í ár en ella. […] Verði aflabrestur má búast við að hagvaxtarhorfur geti versnað um allt að 0,2-0,3% að öðru óbreyttu.“

Frétt af mbl.is

Afleiðingar loðnubrests mögulega varanlegar

„Talsverð staðbundin áhrif“

Talið er að loðna hafi ekki jafn mikla þýðingu fyrir hagkerfið og áður þar sem útflutningsgreinarnar séu nú fjölbreyttari en áður. „Tekjur af loðnu dreifast hins vegar á fá fyrirtæki og sveitarfélög. Af því leiðir að aflabrestur getur haft talsverð staðbundin áhrif. Á það t.d. við í Fjarðabyggð og Vestmannaeyjum en skip með skráða heimahöfn í þessum sveitarfélögum eiga meira en helming aflaheimilda í loðnu.“

Frétt af mbl.is

Framtíðartekjur sagðar í húfi

Þá er einnig bent á að umrædd sveitarfélög reiði sig á fleira en loðnuveiðar. „Mörg þeirra eru t.a.m. umsvifamikil í makrílveiðum, en Alþjóðahafrannsóknaráðið hefur lagt til að hámarksafli í makríl árið 2020 verði 922 þúsund tonn, sem er 20% aukning frá fyrra ári. Mikil sókn sjókvíaeldis vinnur einnig að einhverju leyti upp á móti aflabresti í loðnu á Austfjörðum.“