Morgunblaðið | 5.2.2020 | 5:30 | Uppfært 12.2.2020 10:36

Miklar breytingar fyrirhugaðar á grásleppuveiðum

Fundurinn um veiðar á grásleppu var haldinn í Ráðhúsinu í Stykkishólmi og var vel sóttur. mbl.is/Gunnlaugur Árnason

Stykkishólmi | Snæfell, félag smábátaeigenda á Snæfellsnesi, hélt nýlega fund í Stykkishólmi um grásleppuveiðar. Veiðarnar eru mikilvæg atvinnugrein í Hólminum og þar er landað mestu magni af grásleppu á Íslandi.

Nú stendur til að gjörbreyta reglugerð um veiðarnar, meðal annars er fyrirhugað að fækka netum verulega, að því er fram kemur í Morgunblaðinu í dag. Hingað til hefur veiðunum verið stjórnað frá ári til árs, með mismunandi fjölda daga og neta. Að vonum eru skiptar skoðanir meðal grásleppusjómanna um breytingarnar og hagsmuni.

Á fundinn mættu Kristján Þór Júlíusson sjávarútvegsráðherra, Axel Eyfjörð Friðriksson, gæðastjóri hjá Vigni G. Jónssyni ehf., og Kristinn Hjálmarsson, verkefnastjóri Icelandic Sustainable Fisheries.

Kristján Þór gerði grein fyrir hugmyndum sínum um breytingar á grásleppuveiðum. Tímarnir væru breyttir og taka yrði tillit til þess. Núverandi stjórnun væri barn síns tíma miðað við þær kröfur sem nú væru gerðar til veiðanna, hráefnis og sölumála. Fram að þessu hafa grásleppusjómenn reynt að afla sem mest þá daga sem þeim er úthlutað.