Morgunblaðið | 7.2.2020 | 14:21 | Uppfært 14:52

Skip Samherja í Namibíu kyrrsett á ný

Heinaste hefur verið kyrrsett á ný, nú á forsendum annarra laga en í fyrra skiptið.

Kyrrsetningu namibískra stjórnvalda á Heinaste, skip í eigu Esju Holding sem Samherji á meirihluta í, var aflétt á miðvikudag en var í dag kyrrsett aftur. Áður hafði skipið verið kyrrsett vegna brota á fiskveiðilöggjöf en nú vegna brota á lögum um skipulagða glæpastarfsemi, að því er segir í umfjöllun Kjarnans.

Frétt af mbl.is

Togarinn Heinaste kyrrsettur af dómara

Skipstjóri Heinaste, Arngrímur Brynjólfsson, var á miðvikudag dæmdur til að greiða sekt vegna ólöglegra veiða. Kröfu namibískra stjórnvalda um að gera skipið upptækt var hins vegar vísað frá.

Ný kyrrsetning stjórnvalda er sögð vera til bráðabirgða á meðan yfirvöld vinna kröfugerð sína vegna meintra brota á lögum um skipulagða glæpastarfsemi.

Fram kom í tilkynningu frá Samherja í gær að unnið væri að því að hætta starfsemi í Namibíu og að tvö af þremur skipum félagsins sem höfðu stundað veiðar við strendur landsins væru nú komin úr lögsögu þess. Þá sagði í tilkynningunni að unnið væri að því í samráði við namibísk stjórnvöld að finna lausnir hvað þriðja skipið, Heinaste, varðar.