Morgunblaðið | 12.2.2020 | 18:08 | Uppfært 22:05

Fyrsta kvörtunarbréfið til Hafró

Húsnæði Hafrannsóknastofnunar við Skúlagötu. mbl/Arnþór Birkisson

Maríanna H. Helgadóttir, formaður Félags íslenskra náttúrufræðinga, segir að félagið hafi ekki áður sent Hafrannsóknastofnun bréf þar sem látnar eru í ljós áhyggjur yfir stjórnarháttum hennar, líkt og gert var í síðustu viku.

Í bréfinu kemur fram að félagsmenn sem starfa hjá stofnuninni virðist upplifa „ógnarstjórnun“ frá yfirmönnum sínum, sem sýni þeim vanvirðingu.

Frétt af mbl.is

Starfsmenn upplifa „ógnarstjórnun“ hjá Hafró

„Við gerum þetta stundum þegar margir félagsmenn leita til okkar og kvarta undan aðstæðum á vinnustað. Þá sendum við út bréf til að ávarpa þessa stöðu og við viljum að stjórnendur taki jákvætt í það,“ segir Maríanna. Umrætt bréf var afhent á fundi félagsins með forstjóra Hafrannsóknastofnunar.

Maríanna H. Helgadóttir (lengst til vinstri). mbl.is/Hari

Innt eftir því hversu margir kvörtuðu undan aðstæðum hjá Hafró segir Maríanna að félagið upplýsi aldrei um fjölda þeirra félagsmanna sem gera slíkt.

Sigurður Guðjónsson, forstjóri Hafró, sagði í samtali við mbl.is í dag að bréfið hefði komið sér óvart en Maríanna kveðst ekki vilja tjá sig um viðbrögð forstjórans.