Morgunblaðið | 13.2.2020 | 21:08 | Uppfært 21:24

Kennsla fellur niður vegna veðurs

Óveður er í aðsigi. mbl.is/Ómar Óskarsson

Kennsla í öllum grunnskólum og leikskólum á Seltjarnarnesi, í Garðabæ, Kópavogi, Mosfellsbæ og Hafnarfirði fellur niður á morgun vegna veðurs. Rauð veðurviðvörun verður í gildi á höfuðborgarsvæðinu frá því klukkan sjö til ellefu í fyrramálið.

Auk þess fellur kennsla niður í grunn- og leikskólum í höfuðborginni á morgun.

Frétt af mbl.is

Öll kennsla í leik- og grunnskólum í Reykjavík fellur niður

Líkt og í Reykjavík verða skólar í öðrum sveitarfélögum á höfuðborgarsvæðinu opnir með lágmarksmönnun fyrir fólk sem þarf nauðsynlega á vistun fyrir börn sín að halda - það er fólk sem sinnir neyðarþjónustu, löggæslu, slökkvistörfum og björgunarsveitarútköllum.

Ríkislögreglustjóri hefur lýst yfir óvissustigi almannavarna fyrir allt landið vegna veðursins sem skellur á öllu landinu snemma í fyrramálið. Lögreglan bendir á að um tíma verður ekkert ferðaveður á höfuðborgarsvæðinu.