Morgunblaðið | 13.2.2020 | 23:17

Samhæfingarstöð virkjuð á miðnætti

Rauð viðvörun hefur verið gefið út vegna veðurs á höfuðborgarsvæðinu, Suðurlandi, Faxaflóa og Suðausturlandi og tekur hún gildi ýmist klukkan 5 eða 6 á föstudagsmorgun. Kort/Veðurstofa Íslands

Ofsaveðri sem spáð er fram á annað kvöld er þegar farið að láta til sín taka á suðurhluta landsins, ekki síst í Vík og Vestmannaeyjum. Rauð viðvörun er í gildi á höfuðborgarsvæðinu, Suðurlandi, Faxaflóa og Suðausturlandi og er þetta í fyrsta skipti sem rauð viðvörun er gefin út í þessum landshlutum.

Frétt af mbl.is

Rauð viðvörun á höfuðborgarsvæðinu og Suðurlandi

Óvissustigi almannavarnar hefur verið lýst yfir vegna óveðursins og samhæfingarstöð almannavarna í Skógarhlíð verður virkjuð á miðnætti. Dagur elskenda, Valentínusardagurinn, er einmitt á morgun og segja má að hann hefjist með hvelli.

Samhæfingarstöð almannavarna í Skógarhlíð tekur til starfa á miðnætti. Myndin er úr safni. mbl.is/Eggert Jóhannesson

Að sögn Rögnvaldar Ólafssonar hjá almannavörnum á veðrið að ná hámarki milli klukkan 7 og 11 í fyrramálið. Vonda veðrinu getur fylgt snjókoma og blindbylur, og segir Rögnvaldur að æskilegt sé að sem fæstir bílar verði á götunum. Þá er viðbúið að einhverjar truflanir geti orðið á raforkukerfi, segir Rögnvaldur, en bætir við að raforkufyrirtæki hafi gert ráðstafanir og verði með aukinn mannskap á vakt á morgun.

Í tilkynningu frá RARIK segir að miklar líkur eru á að veðrið muni hafa áhrif á afhendingu rafmagns, bæði í dreifikerfi RARIK og landskerfinu (flutningskerfi Landsnets). RARIK er í viðbragðsstöðu til að bregðast við hugsanlegum bilunum á dreifikerfinu.

Frétt af mbl.is

„Þetta er hættulegt veður“

Lokanir og snjóflóðahætta

Búast má við víðtækum lokunum vega og hefur Vegagerðin gefið út áætlun um mögulegar lokanir. Meðal fyrirhugaðra lokana má nefna Hellisheiði og Reykjanesbraut frá klukkan 1 í nótt 3 og Holtavörðuheiði og Öxnadalsheiði frá miðnætti en áætlunina í heild sinni má sjá hér.

Veðrinu fylgir einnig snjóflóðahætta, meðal annars á Flateyrarvegi, Súðavíkurhlíð og Ólafsfjarðarmúla.

Viðbragðsaðilar munu fylgjast grannt með gangi mála og hefur undirbúningur staðið yfir síðustu daga. Líkt og sjá má í færslu Veðurstofunnar var samráðsfundur stofnunarinnar þétt setinn í dag, en hann var óvenju fjölsóttur enda aðstæður sérstakar en þetta er í fyrsta sinn sem rauð viðvörun er gefin út á höfuðborgarsvæðinu, Suðurlandi, Suðausturlandi og Faxaflóa.