Morgunblaðið | 14.2.2020 | 17:30

Blés rækilega á Fáskrúðsfirði

Hvassviðri var á Fáskrúðsfirði í morgun. mbl.is/Þorgeir Baldursson

Vonskuveður hefur verið um allt land í dag og var heldur hvasst á Fáskrúðsfirði þegar Ljósafell, togari Loðnuvinnslunnar, kom til hafnar klukkan sex í morgun. Þá bætti rækilega í þegar leið á daginn, segir fréttaritarinn Þorgeir Baldursson sem hefur fylgt skipinu.

Hann segir að togaranum hafi verið stefnt að landi fyrr en áætlað var til þess að forðast slæm veðurskilyrði og að mikil bræla hafi verið. Þá hafi verið komnir um 25 metrar á sekúndu um klukkan 10 og fór veðrinu versnandi eftir því sem leið á daginn.

Stefnt er að halda aftur til sjós á morgun en að aðstæður verði skoðaðar þar sem spáð er sex til níu metra ölduhæð, að sögn Þorgeirs.