Förðunartískan fyrir vorið snýst um að endurspegla sérstæðu og eru förðunarfræðingar alltaf að fara nær listrænni nálgun í förðun í stað þess að fylgja úreltum reglum. Þegar litið er yfir farðanir á tískusýningum vorlínanna má sjá hvernig sköpunar- og litagleði einkennir þær.
1. Glossaðar varir
Eftir mikla sigurför mattra varalita er glossið að snúa aftur. Hvort sem þú einfaldlega setur á þig glært gloss eða setur gloss fyrir varalit eða varalitablýant þá eru djúsí varir málið í vor.
2. Húðin fullkomnuð á náttúrulegan hátt
Oftar en ekki höfum við séð farðalausar fyrirsætur ganga sýningarpallinn á vor- og sumarsýningunum. Þessi ferskleiki er enn þá til staðar en þó fullkomnaður. Núna mátti sjá ögn af léttum farða og hyljara á andlitum fyrirsætanna og var húðin þannig fullkomnuð en þó haldið mjög náttúrulegri í senn.
3. Skygging andlitsins
Það var áberandi meira af skyggingu undir kinnbeinum þetta vorið. Við erum nú ekki að tala um endurmótun andlitsins í anda Instagram en það glitti í meira sólarpúður og brúna skugga. Á sýningu Chanel notaði Lucia Pica heldur meira af hlýjum tónum fyrir andlitið og sömuleiðis voru fyrirsætur Burberry með aukna mótun í förðuninni.
4. Áberandi varir
Rauðar og vínrauðar varir mátti sjá á sýningarpöllum hinna ýmsu tískuhúsa. Þetta er í talsverðri mótsögn við hugmyndir okkar almennt um ferskleikann sem fylgir vorinu. Hins vegar fögnum við alltaf tækifærinu til að setja áberandi varalit á okkur.
5. Litrík augnförðun
Skot af áberandi litum mátti sjá í bland við annars látlausa förðun. Neon-litatónar voru gjarnan áberandi í augnlínufarða en eins mátti sjá bjarta pastelliti yfir allt augnlokið. Þetta er skemmtileg leið til að gera förðunina bjartari og ferskari.
6. Glimmer og metal-áferð
Það var gaman að sjá hvernig notkun á glimmeri og metal-kenndum áferðum var gerð hversdagslegri en oft áður. Margir tengja slíkar snyrtivörur við áramótin eða önnur hátíðleg tilefni. Núna seturðu einfaldlega glimmer á augnlokin þín þegar þig langar til þess, eða yfir varirnar sértu í stuði.
7. Augnlínufarðinn tekinn upp á næsta stig
Það var gaman að sjá hvernig förðunarfræðingar létu sinn innri listamann ráða för þegar kom að því að teikna augnlínufarða á fyrirsæturnar. Hinn klassíski svarti augnlínufarði fékk að víkja fyrir mun grafískari og litríkari lögun.